Rrjeti i Qendrave Burimore në Mal të Zi, në kuadër të Katalogut të trajnimeve për vitin 2026, organizon trajnim mbi temën Menaxhimi financiar, i cili do të mbahet më 3 dhe 4 korrik 2026 në hotelin Onogosht në Nikshiq.
Qëllimi i trajnimit është t’u mundësojë përfaqësuesve të organizatave të shoqërisë civile të vogla dhe mesatarisht të zhvilluara përvetësimin e njohurive praktike mbi rregullat e menaxhimit financiar të projekteve, mbajtjen e evidencës kontabël dhe dokumentacionit të nevojshëm, si dhe mbi zbatimin efektiv të aktiviteteve të projektit dhe përgatitjen e raporteve financiare.
Në trajnim do të marrin pjesë gjithsej 16 përfaqësues të organizatave të shoqërisë civile. Të drejtë aplikimi kanë organizatat e vogla dhe mesatarisht të zhvilluara, të cilat mund të delegojnë një përfaqësues të përfshirë aktivisht në punën e organizatës. Gjatë përzgjedhjes së pjesëmarrësve, përparësi do t’u jepet organizatave, përfaqësuesit e të cilave deri më tani nuk kanë ndjekur trajnime të ngjashme, duke marrë parasysh edhe motivimin e shprehur për pjesëmarrje.
Pjesëmarrësit e interesuar duhet të plotësojnë formularin e aplikimit dhe ta dërgojnë në e-mail: crnvo@crnvo.me, jo më vonë se data 25 qershor 2026, deri në orën 15:00. Aplikimet e paplota dhe ato që dorëzohen pas afatit nuk do të merren në shqyrtim.
Rrjeti i Qendrave Burimore, si organizator i trajnimit, do të sigurojë të gjitha materialet e nevojshme për punë, akomodimin, ushqimin dhe pijet freskuese për pjesëmarrësit. Shpenzimet e transportit do të rimbursohen në vlerën e biletës së autobusit që pjesëmarrësit paraqesin për verifikim, përkatësisht në vlerën e shpenzimeve të karburantit të llogaritura në faqen Michelin, me detyrimin për të paraqitur faturën e karburantit.
Ky trajnim përfaqëson një mundësi të shkëlqyer për organizatat e shoqërisë civile që të forcojnë kapacitetet e tyre në fushën e menaxhimit financiar dhe të kontribuojnë në zbatimin më efikas të projekteve të tyre.
Ky aktivitet është pjesë e Programit “Rrjeti i qendrave burimore të Malit të Zi”, i cili mbështetet nga Ministria e Zhvillimit Rajonal dhe Investimeve dhe Bashkëpunimit me Organizatat Joqeveritare, ndërsa zbatohet nga Qendra për Zhvillimin e Organizatatave Joqeveritare (qendra kombëtare burimore), Aktivna Zona, Qendra Demokratike e Bijello Poles dhe Horizontit të Ri (qendra rajonale burimore), si dhe OJQ-të Natura, Bonum dhe Nada në rolin e zyrave lokale.
