OJQ “Horizonti i ri”, në partneritet me OJQ “Këndi i tolerancës”, nis zbatimin e projektit “CrossKultura – Horizont i mirëkuptimit”, i cili ka për qëllim fuqizimin e të rinjve nga Ulqini dhe Tivari përmes promovimit të dialogut ndërkulturor, tolerancës dhe respektit për diversitetin. Projekti financohet nga Ministria e të Drejtave të Njeriut dhe Pakicave.
Gjatë 11 muajve të ardhshëm, 25 aktivistë të rinj do të ndjekin Shkollën e Dialogut Ndërkulturor, një program arsimor joformal ku do të mësojnë mbi të drejtat e njeriut dhe të pakicave, tejkalimin e paragjykimeve, komunikimin jo të dhunshëm, parimet e demokracisë dhe qytetarinë aktive.
Përveç kësaj, projekti do të përfshijë takime e udhëtime të përbashkëta të të rinjve, fushata sensibilizuese dhe manifestime ndërkulturore .
Në aktivitetin përmbyllës, vijuesve të programit do t’u ndahen diploma për pjesëmarrje të suksesshme në projekt.
Përmes këtyre aktiviteteve, të rinjtë pjesëmarrës do të:
– zhvillojnë njohuri dhe kompetenca mbi ndërkulturalizmin dhe të drejtat e njeriut e të pakicave;
– njohin rolin e tyre në ndërtimin e një shoqërie demokratike dhe gjithëpërfshirëse;
– krijojnë bashkëpunim dhe shkëmbim përvojash me bashkëmoshatarë nga komunitete të ndryshme;
– kontribuojnë në rritjen e vetëdijes publike mbi bashkëjetesën dhe uljen e distancës etnike.
Të gjitha këto aktivitete do të kontribuojnë në qëllimin e përgjithshëm të projektit – edukimin e të rinjve mbi vlerat ndërkulturore dhe fuqizimin e tyre për të promovuar e praktikuar në përditshmëri konceptin e tolerancën, diversitetit dhe mirëkuptimit në një shoqëri multietnike.
Projekti ka rëndësi të veçantë për komunitetet multikulturore si Ulqini dhe Tivari, ku diversiteti etnik dhe gjuhësor përbën një pasuri që duhet të ruhet. Përmes edukimit, takimeve dhe iniciativave të përbashkëta, “CrossKultura” do të kontribuojë në uljen e distancës etnike, forcimin e besimit reciprok dhe ndërtimin e një shoqërie gjithëpërfshirëse.
